Իրականում, մարքեթինգը միշտ չէ, որ բացահայտ է արվում։ Երբեմն ամենաարդյունավետ արշավներն աննկատ են մնում։ Դրանք կարող են իրականացվել ոչ ավանդական մոտեցումներով և հաշվարկված են երկարատև ազդեցություն թողնելու համար։

De Beers. ինչպե՞ս նրանք հավերժացրին ադամանդ նվիրելու սովորույթը

Երբևէ մտածե՞լ եք՝ ինչպես փայլուն քարը դարձավ սիրո և նվիրվածության խորհրդանիշ։ Սա խելացի դիզայնի, հիանալի մարքեթինգի և դարավոր ավանդույթների հետաքրքիր պատմություն է։

Մինչև 20-րդ դարի սկիզբ՝ նշանադրության օրն ադամանդ նվիրելն այդքան էլ ընդունված չէր։ De Beers-ն այս ժամանակ վերահսկում էր ադամանդի արտադրության մեծ մասը և որոշեց փոխել դա։

Արդեն 1938 թվականին նրանք լայնածավալ մարքեթինգային արշավ սկսեցին՝ ադամանդները կապելով հավերժական սիրո հետ։ Նրանք ներգրավեցին հայտնի դերասանուհիներին և բարձր հասարակության այլ ներկայացուցիչներին (բարև՜, ինֆլյուենսեր մարքեթինգ)։ Վերրջիններիս տվեցին ադամանդե զարդեր՝ կրելու համար, պայմանով, որ նրանք ընդգծելու էին մաքուր քարի կարևորությունը ֆիլմերում և ամսագրերում։

1947 թվականին De Beers-ի գովազդային գործակալությունը՝ N.W. Ayer & Son-ը, ստեղծեց խորհրդանշական «Ադամանդը հավերժ է․․․»  կարգախոսը (A Diamond Is Forever)։ Այս արշավը հեղափոխեց շուկան և ադամանդե քարով մատանիները դարձան նշանադրության անբաժանելի մասը։ Սա ևս մարքեթինգի հզոր օրինակ է, որը ձևավորել է նոր ավանդույթներ և հեղափոխել շուկան՝ ամբողջ աշխարհով մեկ առաջացնելով երկարաժամկետ և կայուն պահանջարկ։

 

Ի՞նչ ճանապարհ է անցել ադամանդը. նորարարությունից մինչև ավանդույթ

Եկեք ավելի խորը ուսումնասիրենք ադամանդի պատմությունը։ Թե ինչպես Tiffany & Co.-ն նորարարություններ մտցրեց, De Beers-ը մարքեթինգն իրականացրեց, և այդ ամենը հիմք հանդիսացավ ադամանդե նշանադրության մատանուն։

Ասպեկտը	Tiffany & Co.: Նորարարը	De Beers: Մարքեթոլոգը
Դեր	Նորարարական դիզայն ստեղծեց ադամանդե նշանադրության մատանիների համար։	Կարևոր դեր խաղաց ադամանդե նշանադրության մատանիների ավանդույթի հաստատման և տարածման գործում՝ ռազմավարական մարքեթինգի միջոցով։
Հիմնական գործողությունները	1886 թվականին ներմուծեց «Tiffany setting»՝ վեց ատամիկով մատանի, որը նախատեսված էր ադամանդը բարձրացնելու և դրա փայլն առավելագույնի հասցնելու համար՝ սահմանելով նոր չափանիշ նշանադրության մատանիների համար։	Սկսեց մարքեթինգային արշավներ, ներառյալ 1930-ականների կարգախոսը՝ «Յուրաքանչյուր ամերիկացի հարսնացու արժանի է ադամանդե մատանու» (ըստ Arden Jewelers-ի) և խորհրդանշական «Ադամանդը հավերժ է» (A Diamond Is Forever) արշավը 1947 թվականին, որն ադամանդները կապեց հավերժական սիրո և նվիրվածության հետ։ Նրա շնորհիվ տարածվեց որոշակի գումար (օրինակ՝ երկու ամսվա աշխատավարձ) նշանադրության մատանու վրա ծախսելու գաղափարը։
Ազդեցությունը	Tiffany-ի դիզայնը դարձավ ստանդարտ՝ նշանադրության ադամանդե մատանիների համար և մինչ օրս մեծ պահանջարկ ունի։	Ընկերության մարքեթինգային արշավները զգալիորեն ավելացրեցին ադամանդի վաճառքը և նշանադրության ադամանդե մատանիները դարձրեցին ավանդույթ՝ հեղափոխելով շուկան։
Կենտրոնացումը	Դիզայն և նորարարություն։	Շուկայի ստեղծում, պահանջարկի ձևավորում և մշակութային ազդեցություն։

 

Սթորիթելինգի ուժը. ինչո՞ւ է այն վաճառքներ ապահովում

Այսօրվա աշխարհում մարքեթինգը մեծապես կենտրոնացած է պատմելու վրա։ Մարդիկ կապվում են պատմությունների հետ, ոչ թե պարզապես փաստերի կամ ապրանքի առանձնահատկությունների։

Nike՝ «Just Do It»… սթորիթելինգով

Nike-ը սթորիթելինգի հիանալի օրինակ է։ Նրանց վաճառքի առարկան պարզապես սպորտային կոշիկները չեն, նրանք վաճառում են ոգեշնչում, ձգտում և անձնական սահմանափակումները հաղթահարելու կարողություն։ Nike-ի հայտնի կարգախոսը՝ «Պարզապես արա դա» (Just Do It), ուղերձ է, որը սպորտի շրջանակներից դուրս է և ավելի մոտ կյանքի փիլիսոփայությանը։

Նկատե՞լ եք՝ ընկերության գովազդները հաճախ ներկայացնում են իրական մարզիկների պատմություններ, նրանց պայքարն ու հաղթանակները՝ ստեղծելով խորը հուզական կապ սպառողների հետ։ Հենց դա է սթորիթելինգը՝ պատմության միջոցով վաճառքներ ապահովելը։

Չե՜նք անտեսում հաշվարկները․ մարքեթինգը թվերի մասին է

Չնայած կրեատիվ կոնտենտի և սթորիթելինգի ուժին, մարքեթինգը թվերի մասին է։ Չէ՞ որ դրանք բիզնեսի ամենակարևոր ասպեկտներից են։ Արդյունավետ մարքեթինգը պահանջում է չափումներ, վերլուծություն կատարելու կարողություն և պատկերացում ROI-ի (ներդրումների վերադարձի) մասին։

• Վերլուծության կառավարում
  Թվային մարքեթինգում տվյալների հավաքագրումը և վերլուծությունը կենսական նշանակություն ունեն։ Քանի՞ մարդ է տեսել ձեր գովազդը։ Քանի՞սն է սեղմել դրա վրա։ Որքա՞ն վաճառքի եկամուտ է ստեղծվել։ Google Analytics-ը և նման գործիքները թույլ են տալիս մեզ հետևել օգտատերերի վարքագծին և օպտիմալացնել մեր արշավները։
• Բյուջեի և ROI-ի կառավարում
  Մարքեթոլոգները պետք է խելամտորեն բաշխեն բյուջեն և հասկանան՝ որքան եկամուտ է բերում յուրաքանչյուր մարքեթինգային ներդրում։ Սա օգնում է արդյունավետ բաշխել ծախսերը և բարելավել ապագա արշավները։
• A/B թեստավորում
  Միշտ փորձարկեք տարբեր մոտեցումներ (օրինակ՝ տարբեր վերնագրեր, վիզուալներ, գործողության կոչեր)՝ տեսնելու, թե որն է ամենաարդյունավետը։ Սա թույլ է տալիս կատարելագործել մարքեթինգային մեսիջները՝ հիմնվելով իրական տվյալների վրա։